28 Nëntori shënon një ditë të veçantë për të gjithë shqiptarët anembanë botës, ditën kur flamuri kuqezi u ngrit në Vlorë në vitin 1912, duke simbolizuar pavarësinë, çlirimin dhe krenarinë kombëtare. Kjo ditë shënon një festë kombëtare, ku shkolla jonë ka përgatitur një program të plotë festiv me nxënësit tanë. Ditë më parë, nxënësit tanë të vegjël vizituan zyrën e Ambasadorit të Shqipërisë, z. Petrit Malaj, duke i shprehur urimet e tyre për këtë festë të veçantë.
Programi ynë filloi nën tingujt emocionues të Hymnit të Flamurit, të interpretuar me violinë nga nxënësi ynë i talentuar Rron Kryeziu. Në fjalën hyrëse, nxënësit tonë hapën këtë program duke na kujtuar të gjithëve rëndësinë e kësaj feste. Programi festiv vazhdoi me një fjalim të veçantë nga drejtori i shkollës sonë, z. Bardh Ahmeti, duke ngjallur një ndjenjë të thellë krenarie dhe dashurie. Fjalimi i drejtorit ishte një kujtim i vlerave kombëtare që na bashkojnë nën flamurin kuqezi.
Më pas filluan shfaqjet artistike, ku secila shfaqje pasqyronte kulturën e pasur kombëtare. Interpretimi i “Fjalëve të Qiriut” nga kori i shkollës mbushi dhomën me emocione, ndërsa nxënësit më të vegjël i kënaqën të gjithë me vallëzimin e tyre “Kuq e Zi”.
Shfaqja e dramës na ktheu pas në kohë, duke na kujtuar sakrificat e bëra për pavarësi. Programi vazhdoi me interpretimin emocionues të këngës “Trim mbi trima”, si dhe me recitale, vallëzime dhe performanca muzikore nga klasa të ndryshme, duke përfshirë vallëzimin modern nga nxënësit nën ritmin “Kno bilbil fushave”. Duke i dhënë një prekje të veçantë ngjarjes, nxënësit performuan “Fustani me pika”, duke sjellë ngrohtësi dhe gëzim në skenë.
Një moment i paharrueshëm ishte kënga “Atdheu im”, interpretuar nga nxënësit dhe udhëhequr nga mësimdhënësja jonë e dashur, Fatjona Matoshi. Interpretimi nxori në pah dashurinë dhe përkushtimin që çdo nxënës ndjen për vendin e tij. Aktiviteti kulmoi me një performancë të fuqishme të valles tradicionale tropojane, një simbol i trashëgimisë së pasur kulturore dhe kombëtare.
Para mbylljes së programit, u ftuan të gjithë të vizitojnë ekspozitën e klasave parafillore, ku nxënësit shfaqën krijimet e tyre artistike të frymëzuara nga motivet kombëtare. Përkushtimi, dashuria dhe përpjekja e bërë në punën e tyre është një dëshmi e ndikimit të kësaj dite në brezat e ardhshëm.
Kjo ditë është më shumë se një datë historike, është një kujtesë e fuqishme se kush jemi dhe cila është trashëgimia jonë kulturore dhe historike përmes muzikës, vallëzimit, dramës dhe artit.
Gëzuar Ditën e Flamurit nga Horizon School!
