Në botën e sotme dixhitale, qasja STEM (Shkencë, Teknologji, Inxhinieri dhe Matematikë) po formëson çdo aspekt jetësor. Nga teknologjia e komunikimit, tek zbulimet e vazhdueshme të shkencës, matematikës dhe inxhinierisë, çdo fushë ka ndikim të  vazhdueshëm në jetën tonë të përditshme. Prandaj, në ditën e kushtuar ndaj qasjes STEM, është thelbësore që të njihet rëndësia e këtij edukimi, jo vetëm në zhvillimin e njohurive, por edhe në nxitjen e një ndryshimi pozitiv që mbështet nxënësit në zhvillim drejt së ardhmes.

Në kuadër të planprogramit tonë shkollor, ne i japim prioritet kësaj qasjeje, jo vetëm nga njohuritë teorike, por edhe përmes projekteve të shumta, punës praktike në laboratore, si dhe orëve të kodimit dhe programimit. Është e rëndësishme që të kuptohet se njohja e koncepteve qysh nga mosha e re, do të ju ofrojë nxënësve një mundësi që të jenë në dijeni të këtyre fushave dhe rëndësisë së tyre.

Qasja STEM nuk është e kufizuar. Nxënësit tanë vazhdimisht inkurajohen të mendojnë jashtë kutisë, të krijojnë gjëra të reja dhe të ndërtojnë mendime kritike. Përmes pyetjeve, analizës dhe vlerësimit të informacionit në mënyrë kritike, nxënësit mësojnë se si të zgjidhin problemet dhe sfidat me të cilat mund të përballen çdo ditë. Përmes vlerësimit, ata do të jenë të gatshëm që të gjejnë zgjidhje praktike dhe të lehta.

Gjithashtu, përgatitja profesionale e mësimdhënësve tanë, si dhe ambientet moderne të Horizon School, u ofrojnë nxënësve një mjedis nxitës, frymëzues dhe bashkëpunues që të zhvillohen më tutje.

Dita e kushtuar ndaj qasjes STEM na kujton se e ardhmja duhet të krijohet nga mundësitë e pafundme që kemi në këto kohë. Duke investuar në edukimin e fëmijëve, ne po ushqejmë një brez që janë të pajisur jo vetëm me njohuri, por me një vizion afatgjatë. Së bashku, përpiqemi që të ndërtojmë një të ardhme ku nxënësit tanë janë të përgatitur për të ndryshuar, udhëhequr dhe formësuar botën.

E ardhmja nis me ne!
Horizon School, a Cambridge International School

Tetori rozë shënon muajin e kancerit të gjirit, një nga kanceret më të zakonshme, i cili prek miliona gra në mbarë botën dhe nuk ndikon vetëm tek të prekurit, por edhe në familje, shoqëri dhe komunitetin përreth. Megjithatë, ndërgjegjësimi, zbulimi i hershëm dhe trajtimi në kohë mund të përmirësojnë ndjeshëm rezultatet dhe të shpëtojnë jetën e pacientëve. Edukimi i vajzave dhe grave rreth metodave të zbulimit të hershëm si vetë-ekzaminimi, mamografia dhe të kuptuarit e faktorëve të rrezikut, luan një rol vendimtar në këtë aspekt. Megjithatë, rritja e ndërgjegjësimit nuk ka të bëjë vetëm me edukim, por edhe me krijimin e një mjedisi mbështetës ku gratë ndihen të fuqizuara për të marrë përgjegjësinë për shëndetin e tyre.

Si institucion arsimor, ne në Horizon School e njohim rëndësinë e ndërgjegjësimit për kancerin e gjirit dhe kuptojmë përgjegjësinë tonë për të edukuar dhe ndërmarrë veprime konkrete. Këtë vit, kemi shkuar përtej diskutimeve në klasë për të ndërmarrë hapa të prekshëm drejt ndryshimit. Si pjesë e fushatës sonë ndërgjegjësuese këtë tetor, kemi organizuar një aktivitet që synon edukimin e nxënësve, stafit dhe prindërve për parandalimin e kancerit të gjirit, simptomat dhe zbulimin e hershëm. Në kuadër të aktivitetit tonë, kemi mbledhur fonde financiare për të mbështetur shoqatat që punojnë me gratë e prekura nga kanceri i gjirit, kryesisht shoqatën RENESANSA. Fondet e mbledhura do t’i dhurohen kësaj shoqate që ofron shërbime thelbësore si mbështetje, këshillim dhe rehabilitim për gratë që kalojnë nëpër trajtim dhe shërim.

Nëpërmjet kësaj nisme, ne synojmë jo vetëm të mbledhim fonde, por edhe të frymëzojmë një ndjenjë komuniteti dhe mbështetje. Nxënësit tanë patën mundësinë të marrin pjesë në shitjen e ushqimeve të përgatitura nga ata, shitjen e “pink ribbons” dhe të marrin pjesë në ekspozitën e artit me temën “Pink Month”. Ndërmjet këtyre aktiviteteve, nxënësit panë sesi veprimet e tyre, sado të vogla qofshin, mund të kontribuojnë në një kauzë më të madhe dhe të bëjnë një ndryshim të vërtetë në jetën e atyre që kanë më shumë nevojë. Duke u angazhuar në këtë fushatë ndërgjegjësimi për kancerin e gjirit, nxënësit mësuan rreth rëndësisë së shëndetit, mbështetjes së personave të prekur nga ky kancer apo çfarëdo sëmundje tjetër dhe mbrojtjen e kauzave të rëndësishme.

Kanceri i gjirit mund të na prek të gjithëve, drejtpërdrejt ose tërthorazi, dhe ne besojmë se shkollat mund të luajnë një rol kryesor në promovimin e ndërgjegjësimit dhe ofrimin e mbështetjes. Së bashku, ne mund të nxisim një mjedis ku ndërgjegjësimi çon në veprim, parandalim dhe shpresë. Le të vazhdojmë të qëndrojmë të bashkuar në luftën kundër kancerit të gjirit, sepse në këtë sfidë askush nuk e meriton t’a përballojë i vetëm.

Çdo vit me datën 10 tetor, shënohet Dita Ndërkombëtare e Shëndetit Mendor, një ditë që thekson rëndësinë e shëndetit dhe mirëqenies mendore në të gjitha aspektet jetësore. Duke u foksuar kryesisht në fushën e arsimit, shëndeti mendor luan një rol kryesor në rritjen dhe zhvillimin e nxënësve në shkolla. Si mësimdhënës, prindër dhe staf shkollor, kemi për detyrë që të krijojmë një mjedis, ku nxënësit ndihen të mbështetur emocionalisht dhe psiqikisht, duke siguruar që ata të mund të arrijnë suksese në formën e tyre më të mirë.

• Pse është i rëndësishëm shëndeti mendor në shkolla?

Shëndeti mendor shpeshherë neglizhohet, por është po aq thelbësor sa shëndeti fizik në përcaktimin e suksesit të një nxënësi në shkollë. Organizata Botërore e Shëndetit (OBSH) e përkufizon shëndetin mendor si “një gjendje e mirëqenies në të cilën çdo individ është i aftë të realizojë potencialin e tij dhe të përballojë streset e përditshme, duke realizuar synimet e tij në mënyrë produktive”. Kjo do të thotë që nxënësit duhet të ndihen të sigurt, të mbështetur dhe të aftë të shprehin lirisht mendimet, emocionet dhe veprimet e tyre.

Ngarkesat e ndryshme si presioni i detyrave, marrëdhëniet shoqërore me bashkëmoshatarët dhe ndikimet e mediave sociale mund të ndikojnë ndjeshëm në mirëqenien mendore të një nxënësi. Këto presione shpeshherë mund të çojnë në ankth, gjendje depresive dhe probleme të tjera, të cilat mund të pengojnë zhvillimin dhe performancën e nxënësve. Prandaj, shkollat kanë rol kryesor në mbështetjen dhe ndërgjegjësimin për shëndetin mendor, duke krijuar ambiente pozitive për menaxhimin e stresit dhe problemeve tjera.

• Si vepron Horizon School në ndërgjegjësimin dhe mbështetjen e nxënësve në shëndetin mendor?

Si shkollë, ne e kuptojmë nevojën dhe rëndësinë e shëndetit mendor, prandaj kemi krijuar një zonë komode dhe të sigurt për nxënësit tanë. Fillimisht, psikologia jonë e dashur e shkollës ofron një hapësirë konfidenciale ku nxënësit mund të ndajnë mendimet, emocionet dhe përvojat e tyre, duke i ndihmuar ata të tejkalojnë sfidat e përditshme që mund t’i hasin gjatë zhvillimit të tyre.

Përveç psikologes, mësimdhënësit tanë të përkushtuar luajnë një rol thelbësor në monitorimin e shëndetit mendor të nxënësve. Ata njohin nxënësit, sfidat dhe punojnë së bashku me psikologen për shfaqjen e shqetësimeve të ndryshme. Gjithashtu, të gjithë anëtarët e stafit tonë shkollor janë pranë dhe në çdo kohë të hapur për secilin nxënës, duke ju ofruar zgjidhje dhe mbështetjen e nevojshme. Ne besojmë dhe jemi të angazhuar në forcën e përbashkët me të gjithë, për ndërtimin e një komuniteti të shëndetshëm shkollor. Ne inkurajojmë dialogun e hapur ndërmjet nxënësve, prindërve dhe stafit, duke u përpjekur vazhdimisht që të sigurohemi që asnjë nxënës të mos ndihet i padëgjuar dhe i nënvlersuar. Shëndeti mendor është i integruar në plan programin tonë, ku nxënësit mësojnë dhe edukohen më shumë rreth shëndetit mendor dhe rëndësisë së tij.

Kur nxënësit ndihen të mbështetur, performanca e tyre në shkollë përmirësohet, marrëdhëniet bëhen më të forta dhe sfidat kapërcehen shumë më lehtë në një mjedis pozitiv dhe inkurajues.  Dita Ndërkombëtare e Shëndetit Mendor shërben si një kujtesë për rëndësinë e mirëqenies mendore në çdo fushë të jetës. Në Horizon School, ne angazhohemi vazhdimisht që nevojat e nxënësve t’i kemi prioritet, veçanërisht në tema të ndjeshme si shëndeti mendor, emocional dhe fizik.

E ardhmja nis me ne!

Ofrimi i mundësive më të mira për fëmijët tanë nuk është është vetëm një qëllim, është një përgjegjësi e plotë për secilin nga ne. Ne në Horizon School, jemi të përkushtuar për të përmbushur këtë përgjegjësi duke ofruar më të mirën për nxënësit tanë. Tash e një vit, Horizon School është akredituar nga rrjeti prestigjoz i shkollave ndërkombëtare të Cambridge International Education, një moment historik që ka shënuar fillimin e një rrugëtimi transformues për nxënësit dhe mësimdhënësit tanë. Ky akreditim nënkupton më shumë se një titull, ai përfaqëson angazhimin tonë për të ofruar standardet më të larta të arsimit në Kosovë.

Çfarë do të thotë të jesh i akredituar si Cambridge International School dhe si përfitojnë nxënësit tanë?

Të qenurit shkollë e akredituar si Cambridge International School është një tregues i cilësisë dhe standardeve të larta të arsimit që ofron institucioni ynë. Ky akreditim, i dhënë nga Cambridge International Education, kërkon që shkolla të përmbushë kriteret rigoroze në lidhje me përmbajtjen e plan programit, metodave të mësimdhënies dhe mbështetje e vazhdueshme për zhvillimin profesional të mësimdhënëve.

Për nxënësit tanë, ky akreditim ofron një sërë përfitimesh të rëndësishme. Ata kanë qasje në materiale dhe burime të avancuara, mundësi për të zhvilluar aftësi kritike dhe analitike në nivelin më të lartë dhe për të ndjekur një program arsimor që është i njohur dhe i respektuar në të gjithë botën. Horizon School përmes akreditimit si Cambridge international School, u mundëson nxënësve të saj që t’i nënshtrohen testeve ndërkombëtare të përgatitura nga Cambridge International Education dhe nëse i kalojnë me sukses këto teste, ata do të pajisen me diplomë të njohur globalisht.

Pas pajisjes me  diplomë, nxënësit e Horizon School kanë mundësi të shkëlqyera për të vazhduar studimet në universitete prestigjioze dhe për të zhvilluar karriera ndërkombëtare, duke e bërë diplomën e tyre një pasaportë të vlefshme për mundësi globale.

Plan programi ynë mësimor është gërshëtim i përkryer i kurrikulës së MASHTI-it dhe programit të avancuar të Cambridge, i hartuar për të sfiduar nxënësit duke i inkurajuar ata të mendojnë dhe të analizojnë secilën nga lëndët mësimore. Qasja jonë nuk bazohet vetëm në procesin mësimor, por edhe në zhvillimin e karaktereve të forta individuale, zhvillimin e aftësive ndërpersonale dhe shoqërore, si dhe përballjen me sukses të çdo sfide drejt së ardhmes.

Për më tepër, plan programi i Horizon School ka në fokus qasjen STEM, duke vendosur një themel të fortë në fusha thelbësore si matematika, shkenca, teknologjia dhe kodimi, por gjithmonë në përputhje me talentet dhe aktivitetet jashtëshkollore të nxënësve. Ky program siguron që çdo nxënës mund të përshtatë arsimin e tij me pikat e forta dhe synimet e tij individuale.

Ne jemi të përkushtuar të përmirësojmë vazhdimisht standardet tona, duke siguruar që nxënësit tanë të marrin përgatitjen më të mirë të mundshme për të ardhmen e tyre. Ky akreditim është më shumë se një grup standardesh; është një rrugë drejt suksesit, duke u ofruar nxënësve tanë njohuri, aftësi dhe zhvillim. Qëllimi ynë në Horizon School nuk është vetëm të edukojmë, por edhe të fuqizojmë nxënësit tanë për të arritur një të ardhme të suksesshme. Duke qenë pjesë e rrjetit të Cambridge International Education, ne kemi zgjeruar perspektivat dhe horizontet tona, jo vetëm si shkollë, por edhe për prindërit dhe nxënësit tanë.

E ardhmja nis me ne!